Gjatë 24 orëve të fundit sipas të dhënave nga Qendra Kombëtare Operacionale e Emergjencave Civile janë raportuar 23 vatra zjarri, nga të cilat është bërë i mundur izolimi i 19 prej tyre. Në rrjetet sociale, ministri i Mbrojtjes, Niko Peleshi ndau të dhënat e Agjencisë Kombëtare të Mbrojtjes Civile lidhur me situatën e zjarreve në vend.

Sipas AKMC-së, sot mbeten aktive vatrat në: vendgrumbullimin e mbetjeve të bashkisë Vlorë për të cilin janë angazhuar kapacitetet në nivel qarku të mbështetura nga kapacitete të pushtetit qendror dhe subjekte private.

Vatra e zjarrit në fshatin Malecaj të bashkisë Lezhë, ditën e sotme vijon me intensitet të ulët.

Gjatë mbrëmjes së kaluar është bërë e mundur shmangia e rrezikut të kalimit të zjarrit në lagjet Shqut dhe Ish Kampi të këtij fshati.

Po në këtë bashki zjarri në fshatin Torovicë është drejt shuarjes përfundimtare. Po vijojnë operacionin strukturat e pushtetit vendor të mbështetura nga FA.

Është aktive vatra e zjarrit në fshatin Kameras, Bashkia Durrës për të cilin janë angazhuar ditën e djeshme kapacitetet e qarkut Durrës dhe Tiranë duke bërë të mundur shmangien e rrezikut për kalimin e zjarrit në sipërfaqe me pyll dhe ullinj shekullore.

Sot janë angazhuar shërbimi zjarrfikës dhe forca vullnetare.

Zjarri në fshatin Zogaj, bashkia Tropojë për të cilin ditën e djeshme kanë punuar Forcat e Armatosura, strukturat vendore të mbështetura nga një Helikopter I KFOR. Vijojnë edhe ditën e sotme operacionin për vënien nën kontroll të zjarrit dhe shuarjen e tij.

Situata në bashkitë e qarqeve të tjera të vendit ditën e sotme paraqitet relativisht e qetë.

Agjencia Kombëtare e Mbrojtjes Civile dhe FA do të vijojnë të jenë në ndihmë të komunitetit në bashkëpunim me pushtetin vendor.

Në Vlorë, vijon prej tre ditësh zjarri në fushën e mbetjeve ndërsa tymi në formë reje po përhapet në qytetin bregdetar. Në terren punohet për lokalizimin dhe shuarjen e flakëve. Në ndihmë të mjeteve të bashkisë kanë shkuar dhe forcat e ushtrisë. Kryebashkiaku Ermal Dredha tha se zjarri është vendosur nga dora e njeriut e se nisën hetimet për të gjetur autorin apo autorët.

Vendgrumbullimi i mbetjeve urbane në Vlorë nuk plotëson asnjë standard. Flakët kanë përshkuar pothuajse të gjithë fushën, në një zonë të banuar, në lagjen 24 Maji, e njohur si ish-Fusha e Aviacionit. Era favorizon përhapjen e tyre dhe tymi i shkaktuar përshkruhet si mbytës.