Cilësia e ujit të Senës ra përsëri, gjë që ka penguar stërvitjen për garën e përzier të ekipit të triatlonit të së hënës, 5 gusht, në Lojërat Olimpike të Parisit. Reshjet e reja të ditëve të fundit e kanë bërë lumin të mos jetë sërish i sigurt për not. Të gjitha stërvitjet për garat individuale gjithashtu duhet të anulohen.

Pati shqetësime të mëdha rreth ankesave individuale, por disa gara u zhvilluan të mërkurën, pasi uji u konsiderua i sigurt për të notuar. Përveç triatlonit të përzier, javën e ardhshme janë planifikuar të zhvillohen edhe garat e notit 10 kilometra për meshkuj e femra.

Franca ka bërë përpjekje të mëdha gjatë viteve për të përmirësuar cilësinë e ujit të Senës duke investuar rreth 1,4 miliardë euro (1,5 miliardë dollarë).

Në prill të këtij viti, një organizatë franceze për ujin dha alarmin për ndotjen e lumit Sena. Fondacioni “Surfrider” tha se verifikoi gjashtë muaj analiza të kryera nga një laborator dhe arriti në përfundimin se uji i lumit mbetej i ndotur e potencialisht i rrezikshëm.

Në një letër të hapur, organizata me bazë në Biarritz shprehej se “dëshironte të ndante me palët e interesuara shqetësimet në rritje për cilësinë e Senës, por edhe rreziqet me të cilat përballen sportistët që lëvizin në ujë të ndotur”.

“Surfrider” u shpreh se testet ishin kryer nga laboratori Eau de Paris dhe grupi i analizave mjedisore Analy-Co nga shtatori deri në muajin mars, nën urat Alexandre-III dhe l’Alma, ku do të zhvillohen sportet e Lojërave Olimpike.

Standardet europiane të cilësisë së ujit dhe federatat ndërkombëtare të triatlonit e notit në ujëra të hapur, vendosin kufij për përqendrimin e dy baktereve E. Coli dhe Enterokokit, që janë tregues të pranisë së lëndës fekale.

Surfrider tha se matjet e tij kishin treguar nivele shpesh dyfish dhe nganjëherë tre herë më të larta se normat maksimale të lejuara. Arsyeja  kryesore e shpresës për organizatorët olimpikë dhe autoritetet e Parisit ishte se këto nivele u regjistruan gjatë periudhës së dimrit, në një nga dimrat më të lagësht në 30 vjet.

Dihet se reshjet e dendura e kanë pushtuar sistemin e ujërave të zeza të Parisit, duke çuar në derdhje direkte në lumë të ujërave të patrajtuara. Organizatorët gjithmonë kanë pohuar se sporti olimpik mund të zhvillohet në lumë vetëm nëse moti është i thatë ose reshjet e dobëta.