Ministrja e Jashtme gjermane Annalena Baerbock mbrojti një marrëveshje me Uashingtonin për vendosjen e raketave amerikane me rreze të gjatë veprimi në Gjermani, duke përmendur kërcënimin e paraqitur nga presidenti rus Vladimir Putin.

“Të bësh politikë të jashtme sot do të thotë të pranosh se do mbrohemi nga Rusia e Putinit. Ajo që na mbron tani janë investimet në sigurinë dhe forcën tonë, në BE, në NATO dhe në Gjermani. Dhe kjo përfshin vendimin për të vendosur sisteme të armëve amerikane me rreze të gjatë,” shkroi Baerbock në një artikull të ”Bild am Sonntag”.

Ajo tha se armët do të siguronin “një pengesë të besueshme ndaj agresionit rus”.

Baerbock akuzoi Putinin se i përgjigjet çdo nisme paqeje me përshkallëzim, duke shkruar se ai dëshiron vetëm që ”Ukraina t’i nënshtrohet atij”.