Regjisori James Cameron ka bërë së fundmi të ditur titullin e filmit të tij të ri Avatar, “Fire and Ash” [Zjarr dhe hi]. Ai ka bërë një paraqitje të papritur në një ceremoni të organizuar prej gjigantit Disney në Kaliforni dhe ka qenë me yjet e filmit, Zoe Saldana dhe Sam Worthington, për t’i bërë publike detajet e filmit, që do ta ketë premierën më 2025.

Filmi i zhanrit fantashkencë vjen pas Avatarit të vitit 2009 dhe filmit pasues “Avatar: The Way Of Water”, të publikuar më 2022. “Filmi i ri nuk është ai që prisni, por definitivisht është ai që ju duhet”-ka thënë Cameron para një audience me mbi 12.000 njerëz.

Regjisori 69-vjeçar, ka thënë se filmi i ri është krijuar me një koncept të ri që ngacmon imagjinatën dhe që do të ketë karaktere në qiell dhe të rrethuar prej zjarrit. Ai, gjithashtu, ka thënë se audienca “do të dëshirojë ta urrejë” një karakter të ri. “Do të shihni më shumë planet, diçka që nuk keni parë kurrë më parë”. Filmi i ri pritet të ketë premierën më 19 dhjetor 2025.

“Avatar: The Way of Water” ka fituar mbi 1 miliard dollarë në arkat botërore por mund të duhet ta dyfishojë atë për të arritur pikën që James Cameron ka thënë se duhet të shënojë. Shitjet e biletave në Kinë dhe ecuria e përgjithshme e filmit në javët e ardhshme mund ta përcaktojnë këtë. “Avatar: The Way of Water” arriti një moment historik të rëndësishëm duke kaluar 1 miliard dollarë në arkat globale në dy javë.

Por vazhdimi i filmit me fitimet më të larta do të duhet të kapërcejë dy pengesa kryesore për të dyfishuar këtë numër, një shenjë që regjisori i tij, James Cameron, sugjeroi se do të duhej të arrinte për të qenë i suksesshëm. Cameron tha muajin e kaluar se “The Way of Water” do të duhej të ishte “filmi i tretë ose i katërt me fitimet më të larta në histori”. Numri 4 është “Star Wars: The Force Awakens”, i cili fitoi 2.07 miliardë dollarë.