Fatkeqësisht ka ndërruar jetë në moshën 56-vjeçare ish-CEO e YouTube, Susan Wojcicki, një pioniere në teknologji dhe një nga punonjëset e para të Google. E ndjera nuk ia doli me luftën kundër kancerit në mushkëri për dy vjet.

“Me trishtim të thellë ndaj lajmin për ndarjen nga jeta të Susan Wojcicki. Gruaja ime e dashur prej 26 vitesh dhe nëna e pesë fëmijëve tanë na la sot pas dy vitesh që jetoi me kancerin e mushkërive,”-shkroi Dennis Troper në një postim në Facebook. “Ishte jo vetëm shoqja ime më e mirë dhe partnerja e jetës, por edhe një mendje brilante, një nënë e dashur dhe një mike e dashur për shumë njerëz. Ndikimi i saj në familjen tonë dhe në botë ishte i pallogaritshëm. Jemi të pikëlluar, por mirënjohës për kohën që kaluam me të. Ju lutemi mbani familjen tonë në mendimet tuaja ndërsa kalojmë këtë kohë të vështirë.”

Wojcicki, një nga gratë më të shquara në Silicon Valley, kishte qenë e përfshirë me kompaninë mëmë të YouTube, Google, që në ditët e saj të para, kur dy themeluesit e saj punonin nga garazhi i saj në Kaliforni për të ndërtuar një motor kërkimi.

Më vonë ajo u bë punonjësja e 16-të e Google dhe kishte punuar në kompani për gati 25 vjet. CEO i Google, Sundar Pichai, shprehu ngushëllimet e tij në një postim në X.