Taylor Swift performoi në stadiumin Wembley në Londër ditën e djeshme, pak më shumë se një javë pasi policia në Vjenë ndaloi një komplot për një sulm terrorist, që çoi në anulimin e tri koncerteve të turneut të saj “Eras Tour” në kryeqytetin austriak. Përveç ngjarjeve në Vjenë, këto shfaqje vijnë dy javë pas vrasjes së tri vajzave në një sulm me thikë në një klasë kërcimi me temë muzikën e saj në veriperëndim të Anglisë.

Këngëtarja dhe kantautorja amerikane u shfaq në skenën e Wembleyt për këngën e saj hit “22”, e veshur me një bluzë që kishte të shkruar fjalinë “ka shumë gjëra që po ndodhin në këtë moment”, që u interpretua si një referencë ndaj të dy incidenteve. Më vonë gjatë koncertit, Ed Sheeran iu bashkua Swift në skenë si një i ftuar special. Së bashku ata performuan dy këngë në të cilat kanë bashkëpunuar, “Everything Has Changed” dhe “End Game”, përpara se të përfundonin me një interpretim të këngës së Sheeran, “Thinking Out Loud”.

Tre persona të dyshuar si simpatizantë të ISIS-it janë arrestuar në Austri në lidhje me komplotin në Vjenë. Policia e Londrës tha se nuk kishte “asgjë që të tregonte” ndonjë lidhje mes ngjarjeve në Vjenë dhe koncerteve të Swift në kryeqytetin britanik. Megjithatë, siguria e fortë ishte e dukshme në stadiumin Wembley, ndalesa e fundit e turneut evropian përpara se Swift të kthehej në Amerikën e Veriut, në turneun e parë muzikor që ka gjeneruar mbi një miliard dollarë në të ardhura totale.

Swift nuk ka komentuar vetë mbi komplotin e dukshëm kundër shfaqjeve në Vjenë, por tha se ishte “plotësisht e tronditur” pas sulmit me thikë në Britani. Anulimi i tri shfaqjeve të turneut “Eras” të Taylor shkaktoi zhgënjim të madh në Vjenë. Megjithatë, fansat në koncertin e Londrës shprehën mbështetje të palëkundur.

Çmimet e biletave për koncertet e ardhshme të Taylor Swift në stadiumin Wembley në Londër janë rritur në qiell me gati 2000 për qind ndërsa fansat përpiqen të sigurojnë vendet e minutës së fundit. Kjo rritje e çmimeve pason anulimin e shfaqjeve të saj në Ernst-Happel-Stadion të Vjenës, të planifikuar fillimisht për 8, 9 dhe 10 gusht, për shkak të një komploti terrorist të dështuar.

Fillimisht, biletat për koncertet në Londër varionin nga 58 paund për ulëse me pamje të kufizuar deri në 110 paund për qëndrimin e përgjithshëm në këmbë. Megjithatë, platformat e rishitjes si Viagogo, Vividseats, StubHub dhe Gigsberg tani renditin biletat në këmbë deri në 6,515 paund, me më të lirat në dispozicion në 416 paund, sipas shifrave të marra nga Coinpoker.com. Swift do të performojë në Londër nga 15 deri më 20 gusht, me çdo shfaqje që pret një audiencë prej 90,000.