Përveç faktit që është kohë pushimesh, vera është e preferuar për shumëkënd, sepse ka ushqime të ndryshme të stinës në dispozicion, mund të kaloni shumë kohë jashtë dhe për shumë arsye të tjera. Një kujdes të veçantë duhet të tregojmë dhe për miqtë tanë katërputrosh. Animal Humane Society, në bashkëpunim me veterinerët, hulumtuan se cilat ushqime, të cilat konsumojmë gjatë verës, mund t’i japim edhe qenve dhe cilat duhet të shmangen në tërësi.

Para së gjithash, është e rëndësishme të theksohet se ushqimi i njeriut nuk është i mirë për qentë nëse u jepet në sasi të mëdha. Ata mund ta shijojnë atë vetëm ndonjëherë dhe në varësi të shëndetit individual të çdo qeni. Ushqimet që mund t’i jepni qenit tuaj në sasi të vogla janë shalqiri, apo manaferrat e ngrira dhe të freskëta të cilat mund të jenë një ushqim i shijshëm për qentë nëse jepen në sasi shumë të vogla. Është e nevojshme të kihet parasysh fakti që frutat përmbajnë sheqer dhe sasi të mëdha nuk do të ndikonin mirë në shëndetin e qenit.

Megjithatë, rrushi apo rrushi i thatë nuk duhet të hyjnë kurrë në gojën e qenit tuaj, pasi ato janë shumë të rrezikshme për të. Përpara se t’i ofroni fruta kafshës suaj, lani atë tërësisht për të hequr pesticidet dhe papastërtitë. Disa perime do të jenë gjithashtu një shije e shkëlqyer verore për qenushin tuaj në sasi të vogla. Brokoli është i sigurt për qentë dhe është i pasur me fibra dhe vitaminë C dhe ka një përmbajtje të ulët yndyre.

Brokoli është i mbushur me lëndë ushqyese dhe antioksidantë që janë të shkëlqyeshëm si për njerëzit ashtu edhe për qentë. Karotat kanë kalori të pakta, janë të pasura me fibra dhe beta-karoten, e cila prodhon vitaminën A. Plus, marrja e kësaj perime është e mrekullueshme për dhëmbët e qenit tuaj.

Djathi është i pasur me kripë dhe yndyrë, ndaj është mirë që t’ia jepni qenit vetëm në sasi të vogla. Zgjidhni lloje djathi me pak yndyrë për të kufizuar marrjen e kalorive. Djathrat si gouda, edamer ose cheddar janë zgjedhje të shkëlqyera. Gjithashtu, djathi përmban proteina, kalcium dhe vitamina për të cilat qentë kanë nevojë.

Proteinat në mish të tillë si mishi i pulës, proshuta, gjeldeti, janë të shkëlqyeshme për qentë. Përpara se të ndani një kafshatë të vogël me qenushin tuaj, hiqni të gjitha kockat dhe kontrolloni që mishi të jetë gatuar plotësisht për të shmangur problemet e mundshme.