Ushtria e Polonisë deklaroi sot se hapësira ajrore e këtij shteti të NATO-s është shkelur, me dyshime të forta se kjo është bërë nga një dron. Ky incident ndodh pas një serie sulmesh ajrore vdekjeprurëse të kryera nga Rusia ndaj Ukrainës.

Sipas raportimeve, një objekt i paidentifikuar ka hyrë në hapësirën ajrore të Polonisë nga Ukraina. Gjenerali Maciej Klisz, një zyrtar i lartë i ushtrisë polake, tha se ky objekt është konfirmuar nga të paktën tri stacione për gjurmimin përmes radiovalëve. Klisz theksoi se objekti nuk përbënte një kërcënim të menjëhershëm për shkak se “karakteristikat e këtij objekti nënkuptojnë se nuk është raketë, as hipersonike, as balistike dhe as raketë lundruese.”

Ushtria polake po kryen kërkime të intensifikuara për të identifikuar dhe neutralizuar atë që është përkufizuar si një “dron” dhe i cili është gjetur rreth 30 kilometra larg kufirit ukrainas, brenda territorit të Polonisë. Në përgjigje të këtij incidenti, zëdhënësi i ushtrisë polake, Jacek Goryszeëski, njoftoi se “ka pasur gatishmëri të lartë për neutralizimin e këtij objekti,” duke nënkuptuar se forcat polake janë në një situatë të përgatitur për çdo zhvillim të mundshëm.

Ky incident vjen në një kohë kur tensionet midis Rusisë dhe Ukrainës janë të larta dhe kërcënimet e sigurisë janë në rritje. Më herët gjatë ditës, presidenti ukrainas Volodymyr Zelensky i bëri thirrje shteteve evropiane për të rritur mbështetjen ndaj Ukrainës në përpjekjet e saj për të neutralizuar dronët dhe raketat që godasin territorin e saj.

Incidenti është gjithashtu një shenjë e rritjes së kompleksitetit të situatës në rajon, dhe tregon se konflikti mes Rusisë dhe Ukrainës po ka ndikim të drejtpërdrejtë në shtetet fqinjë, duke përfshirë anëtarët e NATO-s si Polonia. Në përgjigje të këtyre zhvillimeve, forcat e sigurisë dhe mbrojtjes në të gjithë rajonin janë të angazhuara në monitorimin dhe mbrojtjen e hapësirës ajrore dhe territoriale.