Reperi amerikan Macklemore ka anuluar koncertin e tij të ardhshëm në Dubai për shkak të akuzave për financim nga Emiratet e Bashkuara Arabe në luftën e Sudanit. Nëpërmjet rrjeteve sociale, reperi i “Thrift Shop” konfirmoi se do të anulonte shfaqjen e tij të tetorit.

“Pas bisedave të shumta me organizatorë dhe miq të besuar dhe leximit/hulumtimit tim, kam vendosur të anuloj shfaqjen time të ardhshme në Dubai këtë tetor.”-deklaroi reperi në një deklaratë zyrtare në Instagram.

“Gjatë muajve të fundit kam pasur një numër njerëzish që kanë kontaktuar me mua, duke ndarë burimet dhe duke më kërkuar që të anuloj shfaqjen në solidaritet me popullin e Sudanit dhe të bojkotoj të bërit biznes në Emiratet e Bashkuara Arabe për rolin që ata po luajnë në gjenocidin e vazhdueshëm dhe krizën humanitare në rajon”-tha Macklemore në Instagram.

“Derisa Emiratet e Bashkuara Arabe të ndalojnë armatosjen dhe financimin e RSF-së, unë nuk do të performoj atje,”-shtoi reperi 41-vjeçar, duke iu referuar Forcave të Mbështetjes së Shpejtë paraushtarake që luftojnë me ushtrinë Sundaneze.

Që nga prilli 2023, lufta ka shpërthyer në kombin afrikan të Sudanit midis ushtrisë sudaneze dhe RSF-së. Ushtria sudaneze, e udhëhequr nga sundimtari de fakto i vendit Abdel Fattah al-Burhan, ka pretenduar për muaj të tërë se Emiratet e Bashkuara Arabe kanë financuar RSF-në.

RSF, e udhëhequr nga ish-zëvendësi i Burhan, Mohamed Hamdan Daglo, më parë ndau pushtetin me ushtrinë pas organizimit të një grushti shteti, megjithatë, konkurrenca midis të dyve u ndez në luftë në prill 2023. Që atëherë, përpjekjet janë duke u zhvilluar për një armëpushim përmes bisedimeve në Zvicër. Megjithatë, këto përpjekje nuk i kanë lehtësuar luftimet apo krizën humanitare në Sudan..