Më shumë se 2,000 fëmijë në Francë janë të detyruar të flenë në rrugë, sipas UNICEF Francës dhe Federatës së Aktorëve të Solidaritetit (FAS). “Është e papranueshme që shoqëria t’i trajtojë fëmijët e saj në këtë mënyrë. Jemi shumë të shqetësuar që situata po përkeqësohet çdo vit, është një tragjedi kur dimë për pasojat katastrofike si për shëndetin mendor ashtu edhe për arsimin”-tha përfaqësuesja e OKB-së në Francë Adeline Hazan.

Ajo vlerësoi se bëhet fjalë për shkelje flagrante të parimeve të Konventës Ndërkombëtare për të Drejtat e Fëmijës, të cilën e ka ratifikuar Franca. “Sa i përket adoleshentëve, ata janë të ekspozuar ndaj rreziqeve të trafikimit të qenieve njerëzore dhe prostitucionit kur jetojnë në rrugë. Është koha që fëmijët, veçanërisht fëmijët e pastrehë, të bëhen prioritet për qeverinë në Francë,”-tha Hazan.

Sipas barometrit të FAS, të paktën 2043 fëmijë përfshirë 467 nën moshën 3 vjeç kanë mbetur natën nga data 19 deri më 20 gusht pa zgjidhje për akomodim me kërkesë të familjes së tyre, dërguar në numrin 115, i cili është menduar për ndihmë emergjente për të pastrehët. Kjo është më pak se 3,000 fëmijë të regjistruar në tetor 2023, por është një shifër e paprecedentë për periudhën e kthimit në shkollë, me rritje 3% në gusht 2023, 27% në 2022 dhe 120% në vitin 2020.