Gafa e kryeministrit të Kosovës, Albin Kurti, në një ushtrim matematikor ka shpërthyer në rrjetet sociale dhe është raportuar gjerësisht edhe në mediat ndërkombëtare. Prestigjozja “Politico” e cilësoi incidentin si një “gabim të algjebrës”, duke e titulluar lajmin: “Kryeministri i Kosovës kërkon falje për ngatërrimin e enigmës matematikore të fëmijëve.”

Në një status në Facebook, Kurti e pranoi gabimin dhe kërkoi falje. Ai tha:

Më duhet të them që tash jam i gëzuar që nuk isha nxënës në atë çast, sepse nuk do të merrja notë kaluese. Ekuacioni i thjeshtë matematikor m’u duk që në sekondën e parë që e kishte zgjidhjen x=5; pra pesë, porsi pesëshet që ua dëshiroj juve. Po të mendoja pak, do ta shihja që zgjidhja e saktë është x=0, por në atë rast, nuk besoj që do të merrja mundin të merrja shkumësin e të shkruaja në dërrasën e klasës suaj. Ju kërkoj falje. Zgjidhja e atij ekuacioni, ashtu qysh ju e dini më mirë se kryeministri i juaj, është x=0.

Ky incident ka nxitur shumë reagime dhe debate në opinionin publik, duke sjellë një moment të veçantë në agjendën e liderëve të Kosovës.