Ngjarja e rëndë e ndodhur së fundmi në Shkodër ka ngjallur mjaft dyshime dhe hipoteza lidhur me një figurë misterioze, e cila u pa në vendngjarje menjëherë pas atentatit.

Në pamjet e regjistruara, shihet një djalë që ecën duke çaluar, me dëmtime në fytyrë dhe me duart e mbuluara me gjak, në dukje në një gjendje shoku. Shumëkush dyshon se ai mund të jetë Ibrahim Lici, një nga figurat kryesore të fisit Lici, dhe supozohet se mund të ketë qenë objektivi kryesor i atentatit.

Ish-prokurori Eugen Beci shprehet se objektivi i këtij atentati nuk kanë qenë rastësisht personat që ndodheshin në Shkodër ato ditë, por pikërisht figura kryesore kundërshtare e grupeve rivale, që dyshohet të jetë Ibrahim Lici.

Për këtë arsye, është spekuluar se atentati ishte menduar për të izoluar dhe prerë mundësinë e ndihmës nga individë të tjerë të afërt, një veprim që përforcon idenë e një goditjeje të planifikuar dhe precize.

Sipas dëshmitarëve okularë, personi i parë që doli nga makina pas ngjarjes u përpoq të ndihmonte viktimën Hamza Lici, duke e nxjerrë nga automjeti dhe duke i dhënë frymëmarrje artificiale. Ky person misterioz, që u pa i plagosur, nuk dihet nëse ka qenë ende në vendngjarje kur mbërriti policia apo nëse është larguar para mbërritjes së uniformave blu.

Policia ende nuk ka bërë një deklaratë zyrtare që të sqarojë ekzistencën e një personi të tretë në makinë, apo për rolin e mundshëm të tij si një tjetër objektiv i sulmit. Dyshimet për një person të tretë janë përforcuar më tej pasi në automjet janë gjetur tre armë.

Në rast se identifikimi i këtij personazhi nuk do të lidhej me Ibrahim Licin, procedura për identifikimin dhe marrjen e tij në pyetje nga autoritetet mund të kishte qenë më e thjeshtë.

Kjo çështje mbetet ende e pazbardhur dhe ka ngjallur shumë pikëpyetje për publikun, ndërsa vazhdon të pritet një reagim dhe sqarim më i qartë nga Policia e Shtetit.