Throwflame, një kompani me seli në Ohio, SHBA ka nxjerrë në treg produktin e saj të ri Thermonator, një qen robot me një flakëhedhës. Ky produkt mund të porositet online dhe kushton 9,420 dollarë. Pavarësisht pamjes së tij kërcënuese, Thermonator është i ligjshëm në çdo shtet të SHBA-së, përveç Maryland-it. Thermonator, i cili peshon 17 kilogramë, shfaqet në një video duke kaluar nëpër pyje dhe duke hedhur flakë deri në 10 metra.

Ndryshe nga pritshmëritë, Throwflame po promovon krijimin e tij për aplikacione që variojnë nga menaxhimi i zjarreve në pyje deri te detyrat bujqësore, argëtimi dhe madje edhe heqja e akullit. Throwflame pretendon me krenari se është prodhuesi më i vjetër i flakëhedhësve në SHBA, duke prezantuar flakëhedhësin e parë të disponueshëm në treg në 2015 që mund të hedhë flakët deri në 15 metra.

“Flakëhedhësit nuk janë ende të rregulluar në mënyrë federale, që do të thotë se çdokush mund t’i blejë ato pa një kontroll të sfondit ose listë pritjeje”,-tha kompania amerikane. Thermonator, i ngjashëm me robotët konvencionalë katërkëmbësh, zbaton teknologjinë flakëhedhëse në shpinën e tij, të pajisur me kamera dhe sensorë për navigim autonom dhe përvetësimin e objektivave. Roboti po shkakton shqetësim publik, duke i bërë përdoruesit e mediave sociale të vënë në dyshim ligjshmërinë dhe rreziqet e mundshme të tij.

Rikujtojmë se “HOUND” i ngjashëm me qenin e një ekipi të Koresë së Jugut u quajt roboti më i shpejtë me katër këmbë kur përshkoi një distancë prej gati 100 metrash në 19.87 sekonda. Laboratori Dinamik i Kontrollit dhe Dizajnit të Robotit në Institutin e Avancuar të Shkencës dhe Teknologjisë në Kore në Daejeon zhvilloi robotin HOUND dhe Rekordet Botërore Guinness konfirmuan se ai theu rekordin për vrapimin më të shpejtë 100 metra nga një robot katërkëmbësh. HOUND pati një shpejtësi mesatare prej 11.26 mph gjatë përpjekjes. “Në simulim, ai mund të përshpejtohet në shpejtësi edhe më të larta, por ne nuk e kemi testuar ende në botën reale,”-tha Young-Ha Shin, projektuesi i robotit, për Guinness World Records.