Kryeministri sllovak Robert Fico u plagos rëndë pasi një atentati me armë zjarri ndaj tij të mërkurën.

Policia arrestoi menjëherë autorin, ndërsa kryeministri u dërgua menjëherë në spital ku raportohet se ndodhet në gjendje të rëndë për jetën.

Kush është Robert Fico

Kryeministri sllovak Robert Fico u rikthye në pushtet pas zgjedhjeve shtatorin e kaluar, në krye të një koalicioni populist-nacionalist.

Ai drejton partinë populiste të krahut të majtë Smer-SSD dhe fitoi votimin tetorin e kaluar me premtimet për të ndërprerë ndihmën ushtarake për Ukrainën, por mohoi të ishte pro-rus.

Fico u detyrua të jepte dorëheqjen si kryeministër pas vrasjes së gazetarit investigativ Jan Kuciak në 2018.

“Nëse Smer hyn në qeveri, ne nuk do të dërgojmë asnjë raund të vetëm municioni në Ukrainë”, u tha Fico mbështetësve gjatë fushatës së tij.

Kjo, si dhe premtimi i tij për t’i rezistuar sanksioneve perëndimore ndaj Rusisë, bëri që disa njerëz ta krahasojnë Fico me kryeministrin e djathtë populist të Hungarisë, Viktor Orban, ndërsa më parë është krahasuar me ish-presidentin amerikan Donald Trump.

Kritikët kanë shprehur shpesh frikë në rritje se Fico do të braktiste kursin pro-perëndimor të Sllovakisë.

Mijëra njerëz kanë mbajtur vazhdimisht protesta në të gjithë Sllovakinë kundër politikave të zotit Fico.

Fico dhe partia e tij SMER, ose Drejtimi, siguruan gati 23% të votave në qendrat e votimit në tetor.

Ai është i njohur për deklaratat kundër gazetarëve dhe ka bërë fushatë kundër imigracionit dhe të drejtave të LGBTQ+.

Kryeministri ka kundërshtuar më parë sanksionet e BE-së ndaj Rusisë – dhe ka qenë kundër anëtarësimit të Ukrainës në NATO.

Ai beson se SHBA dhe vendet e tjera duhet të përdorin ndikimin e tyre për të detyruar Rusinë dhe Ukrainën të arrijnë një marrëveshje paqeje kompromisi.

Politikani themeloi partinë SMER në 1999 dhe ka shërbyer si kryeministër i vendit për më shumë se 10 vjet në tre periudha të ndryshme.

Me një fushatë të bazuar në përmbysjen e reformave shtrënguese, Fico filloi periudhën e tij të parë katërvjeçare si lider i vendit në vitin 2006.

Ai u kthye si lider në zgjedhjet parlamentare të vitit 2012, por dështoi në një përpjekje për të fituar zgjedhjet presidenciale të vitit 2014.

Në vitin 2016, pavarësisht se fitoi zgjedhjet parlamentare, partia e Ficos nuk ishte në gjendje të siguronte një shumicë dhe pasi një koalicion shumëpartiak e lejoi atë të qëndronte si lider, ai dha dorëheqjen në 2018.