David Wisner, i Ngarkuari me Punë i Ambasadës së SHBA-ve, sot vlerësoi punën e bërë me Reformën në Drejtësi, por shtoi se është e nevojshme që të ndërmerren hapa më të vështirë. Gjatë konferencës për prezantimin e strategjisë së re kombëtare të uljes së çështjeve të prapambetura në gjykata, organizuar nga Këshilli i Lartë Gjyqësor, Winser tha se duhet më shumë bashkëpunim mes qeverisë dhe institucioneve.

Kur mendon për Shqipërinë është njësoj sikur jeni përpjekur të kaloni nga një person që thjesht qëndron ulur në një kolltuk, në një atlet olimpik. Dhe të mendosh në 30 vite. Eshtë thuajse një kohë shumë e shkurtër kur mendohet e gjithë koha. Të gjithë keni bërë një punë të jashtëzakonshme. Keni punë të vështirë dhe keni punë fantastike, por mbetet shumë punë për të bërë. Jemi krenar si amerikanë dhe ambasada e SHBA-ve këtu, që bashkë ndajmë vlerat e përbashkëta të demokracisë, të të drejtave të njeriut dhe sundimit të ligjit.

Wisner bëri të ditur se strategjia që po zhvillohet është një angazhim për të adresuar nevojat e qytetarëve.

Këto parime janë thelbësore, sikurse është trajtimi i drejtë i qytetarëve. Dhe në thelb të demokracisë që ofron diçka për njerëzit e saj, në fakt është angazhimi që ajo ka për njerëzit. Numri i çështjeve gjyqësore është vonesë e drejtësisë për qytetarët e zakonshëm. Kjo strategji që po zhvilloni është një angazhim për të adresuar nevojat e qytetarëve. Dëshiroj të përgëzoj KLGJ-në për angazhimin e saj në këtë strategji.

Wisner vlerësoi se dhënia e drejtësisë ndërton besimin e publikut dhe sigurinë në institucionet e drejtësisë dhe sipas tij, kjo do të jetë e vështirë.

Zgjedhjet tuaja e vendosin sistemin e drejtësisë në themele të forta e do të gjenerojnë një të ardhme në drejtësi që plotëson nevojat e shqiptarëve. Hapat që keni ndërmarrë për të përmirësuar situatën kanë qenë të dhimbshëm. Vetting-u ka shkaktuar ndërprerje, por ishte i domosdoshëm dhe ju e hodhët atë hap të vështirë. Eshtë koha për hapa më të ndërlikuar. Ju nxis të bëni hapa më të vështirë që trajtojnë sfida të tjera. Institucionet dhe qeveria duhet të punojnë së bashku dhe të angazhojnë burime për strategjinë që po diskutohet sot.