Ministri i Jashtëm spanjoll, Jose Manuel Albares kërkoi që Izraeli t’i bindet një vendimi të Gjykatës Ndërkombëtare të Drejtësisë (ICJ) që bën thirrje për ndalimin e menjëhershëm të operacioneve të tij ushtarake në qytetin jugor të Gazës, Rafah.

Duke shkruar në platformën e medias sociale X, Albares tha se vendimi i GJND-së ishte “i detyrueshëm” dhe kërkoi “një armëpushim, lirimin e pengjeve dhe akses humanitar”.

“Vuajtjet e njerëzve në Rripin e Gazës dhe dhuna duhet të marrin fund”, shtoi ai.

Spanja ka qenë një nga kritikët më të ashpër në Evropë të veprimeve të Izraelit në Gaza.

Madridi pezulloi të gjitha eksportet e armëve në Izrael menjëherë pasi Izraeli filloi reagimin e tij ushtarak ndaj sulmeve të 7 tetorit nga grupi militant palestinez Hamas.

Në fillim të kësaj jave, Spanja, së bashku me Norvegjinë dhe Irlandën, thanë se do të njihte Palestinën si shtet.

Një Autoritet Palestinez “i fortë” është i nevojshëm për të sjellë paqe në Lindjen e Mesme. Kështu tha shefi i diplomacisë së Bashkimit Evropian, Josep Borrell, teksa u takua kryeministrin palestinez, Mohammed Mustafa, më 26 maj.

 “Është edhe në interesin e Izraelit që Autoriteti Palestinez të jetë funksional sepse në mënyrë që të arrihet paqja, ne na duhet një Autoritet i fortë Palestinez, e jo i dobët”, tha Borrell.

Ai i bëri këto deklarata para nisjes së takimit me kryeministrin palestinez, me të cilin tha se do të diskutojë se si Autoriteti Palestinez mund të forcohet që të marrë udhëheqjen e Gazës nga Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian.