Tanket izraelite ndodhen në kufirin me Rripin e Gazës dhe brenda territorit palestinez, në gatishmëri për të vijuar aksionin e tyre.

Fuqitë arabe i kërkuan Izraelit dhe Hamasit të bien dakord për një marrëveshje, armëpushimi dhe lirimin e pengjeve të përshkruar nga presidenti amerikan Joe Biden.

Sipas propozimit të presidentit amerikan Joe Biden, luftimet do të ndaleshin për gjashtë javët fillestare dhe pengjet do të shkëmbeheshin me të burgosur palestinezë, përpara fillimit të një faze për rindërtimin e Gazës.

Kryeministri izraelit Benjamin Netanyahu, theksoi se luftimet do të duhej të ndalonin përkohësisht për të liruar personat e marrë peng dhe se Izraeli ende planifikon të shkatërrojë Hamasin.

Një deklaratë nga zyra e kryeministrit tha se kabineti i luftës i Izraelit po mblidhej të martën në Jerusalem, por nuk u dhanë detaje të mëtejshme.

Bashkimi Evropian (BE) mbështet plotësisht planin e paraqitur nga presidenti i Shteteve të Bashkuara, Joe Biden, që do të mundësonte një armëpushim të qëndrueshëm në Gazë, lirimin e të gjitha pengjeve dhe rritjen e ndihmës humanitare, tha kryediplomati i bllokut, Josep Borrell në një deklaratë.

Një plan për armëpushim, i shpallur javën e kaluar nga presidenti amerikan, Joe Biden, mes tjerash përfshin armëpushimin e plotë, tërheqjen e forcave izraelite nga zonat e populluara në Gazë, dërgimin e ndihmave atje dhe lirimin e pengjeve nga Hamasi – grupi palestinez i shpallur organizatë terroriste nga SHBA-ja dhe BE-ja.