Zjarret në jug të vendit, Greqia ndihmon me dy avionë zjarrfikës!

AKTUALITET

Zjarret në jug të vendit, Greqia ndihmon me dy avionë zjarrfikës!

vovalbania July 10, 2024 0 koment 2 Mund të lexoni në minuta.

Zjarret në jug të vendit, Greqia ndihmon me dy avionë zjarrfikës!

Dy avionë zjarrfikës të tipit Canadair CL-415 të Forcave Zjarrfikëse të Greqisë po asistojnë në operacionin për shuarjen e zjarreve masivë në jug të Shqipërisë, në bashkitë Dropull e Finiq. Avionët me bazë në Aeroportin e Korfuzit, u ngritën pak minuta më parë nga ishulli grek. Dy zjarrfikës kërkuan ndihmë mjekësore në spitalin rajonal të Gjirokastrës për shkak të djegieve të lehta e asfiksisë nga tymi. Gjendja e tyre shëndetësore u stabilizua dhe ndodhen nën kujdesin e bluzave të bardha.

Masat e nxehta ajrore me origjinë nga Afrika e Veriut kanë mbërthyer vendin me temperatura që sot variojnë 20-42 gradë celcius. Moti parashikohet i kthjellët në territor, përjashtuar vranësirat kalimtare mesatare dhe hera-herës deri të dendura në relievet malore të jugut e në lindje. Në disa raste do të shoqërohen me reshje në formën e shtrëngatave dhe breshër. Pas orëve të pasdites, shirat ndërpriten.

Shërbimi Meteorologjik Ushtarak bën të ditur se sot vendi ynë do të ndikohet nga kushte atmosferike të qëndrueshme për shkak të masave ajrore të nxehta me origjinë nga Afrika e Veriut. Moti parashikohet i kthjellët në të gjithë territorin, përjashtuar vranësirat kalimtare mesatare e hera-herës deri të dendura në relievet malore të jugut, si dhe në lindje të territorit në orët e mesditës e të pasdites.

Në relievet malore të jugut dhe lindje të territorit, në orët e nxehta të ditës (mesditë deri pasdite) ka zhvillim të shpejtë të vranësirave vertikale, të cilat shoqërohen me reshje shiu të dobta. Për një periudhë të shkurtër kohore, reshjet do të jenë në formën e shtrëngatave, shoqëruar me shkarkesa elektrike dhe breshër. Pas orëve të pasdites ka ndërprerje të shirave në këto zona. Ka mjegullinë dhe shikim të reduktuar në momentin e zhvillimit të vranësirave vertikale (prani e reshjeve të shiut).

Era fryn me drejtim veriperëndim – verilindje dhe me shpejtësi mesatare 1-8 m/sek, ndërsa përgjatë vijës bregdetare e në lugina, në momentin e zhvillimit të vranësirave vertikale, era bëhet relativisht intensive dhe fiton shpejtësi 10-16 m/sek, shoqëruar me valëzim në dete të forcës 1-3 ballë.