Trajneri i Spanjës, Luis de la Fuente, pret një finale të furishme kundër Anglisë në “Euro 2024” në Berlin, të dielën e kësaj jave, më 14 korrik. Në një video-mesazh nga Federata Spanjolle e Futbollit, de la Fuente theksoi:

Do të jetë një spektakël i madh dhe ne po e presim me shpresë të madhe!

Spanja, që në çerekfinalen e 9 korrikut mposhti Gjermaninë mikpritëse, rezervoi një biletë për në finale pas fitores 2-1 ndaj Francës, ndërsa Anglia shënoi në kohën e fundit duke mposhtur mbrëmë Holandën me rezultatin 2-1.

Spanja po synon një titull rekord të katërt në Europian, pas triumfeve në vitet 1964, 2008 dhe 2012. Kjo është hera e parë që nga viti 1996 që Spanja dhe Anglia takohen në një turne të madh. Yjet e rinj të Spanjës, Lamine Yamal e Nico Williams, si dhe talenti kryesor i Anglisë, Jude Bellingham, nuk kishin lindur ende në vitin 1996.

De la Fuente e përshkroi Anglinë si një ekip të fortë, me lojtarë të mëdhenj.

Në finale do të përplasen sisteme shumë të ndryshme të lojës. Fizikisht, Anglia është shumë e fortë. Ne duam të imponojmë stilin tonë, të dominojmë lojën e të përpiqemi të mos bëjmë asnjë gabim.

Mbreti Charles III uroi ekipin e futbollit të Anglisë për arritjen në finalen e “Euro 2024”-ës, por i ka kërkuar që të shmangin më shumë dramë të minutës së fundit. Në një mesazh për skuadrën e Gareth Southgate pas fitores 2-1 të “Tre Luanëve” kundër Holandës, Charles u dërgoi lojtarëve “urimet më të mira” dhe “urimet më të ngrohta” të familjes mbretërore.

Por, mbreti bëri shaka për dramën e fundit të përjetuar nga tifozët anglezë duke u kërkuar futbollistëve të kujdesen për presionin e gjakut të kombit në finalen me Spanjën.

Unë dhe Camilla bashkohemi për t’ju përcjellë urimet më të ngrohta për arritjen në finale të Kampionatit Europian të UEFA-s, si dhe për të dërguar urimet tona më të mira për ndeshjen e së dielës! Nëse mund t’ju nxis që të siguroni fitoren përpara nevojës për gola, jam i sigurt se streset në rrahjet e zemrës kolektive të vendit dhe presionin e gjakut do të lehtësoheshin shumë! Paç fat, Angli!

Kryeministri i ri britanik, Keir Starmer, i cili mundi të shihte një pjesë të lojës ndërsa merrte pjesë në një samit të NATO-s në Uashington, konfirmoi se do të marrë pjesë në finalen e së dielës në Berlin.