Gjermania do të vendosë kontrolle të përkohshme kufitare përgjatë kufirit të saj me Francën, në prag të Lojërave Olimpike të Parisit, që nisin më 26 korrik. Këtë e njoftoi ministrja gjermane e Punëve të Brendshme, Nancy Faeser. Vendimi do të ndërmerret në bashkëpunim me autoritetet franceze, me qëllim sigurimin më të madh të Lojërave Olimpike, të cilat përfundojnë më 11 gusht.

Po ashtu, edhe Komisioni Europian do të njoftohet së shpejti. Në anën tjetër, kontrollet e vëna përgjatë kufijve me Danimarkën, Holandën, Belgjikën dhe Luksemburgun, të vendosura gjatë Kampionatit Europian të Futbollit do të hiqen të premten.

Kontrollet kufitare vazhdojnë të mbeten në fuqi përgjatë kufijve të Gjermanisë me Austrinë, Zvicrën, Republikën Çeke e Poloninë, me qëllim luftimin e emigracionit të parregullt dhe trafikimit të njerëzve. Gjermania dhe të gjithë fqinjët e saj të afërt janë anëtarë të Zonës Schengen, e cila garanton lëvizje të lirë përtej shumicës së kufijve brenda Bashkimit Europian.

Organizatorët gjermanë të “Euro 2024”-ës morën frymë të lehtësuar pas finales së djeshme mes Spanjës dhe Anglisë, pasi kanë mbajtur një event pa probleme të mëdha, por nuk kanë arritur të përsërisin suksesin e Kupës së Botës 2006 në shtëpi. “Euro 2024” ishte ngjarja më e madhe sportive ndërkombëtare e Gjermanisë që nga Kupa e Botës 2006, e cila në atë kohë shkaktoi një valë masive entuziazmi në shtëpi, mbushi zonat e tifozëve në mbarë vendin dhe që atëherë është bërë e njohur si “përralla e verës”.

Ndonëse Europiani i këtij viti shkoi pa pengesa të mëdha si në nivelin operacional ashtu edhe në atë të sigurisë, nuk i është afruar aspak suksesit të Kupës së Botës, 18 vjet më parë. Kombëtarja gjermane u eliminua në çerekfinale pa arritur asnjëherë formën më të mirë, duke i lënë mikpritësit me rreth dy javë pasion të ndrydhur nga tifozët vendas. Në Kupën e Botës 2006, Gjermania arriti në gjysmëfinale dhe më pas fitoi play off-in për vendin e tretë kundër Portugalisë.

Transporti midis 10 qyteteve që pritën ndeshjet ishte gjithashtu shumë larg efikasitetit mbresëlënës të vitit 2006, me vonesa që penalizuan tifozët e madje edhe ekipet, duke përfshirë skuadrën holandeze që iu desh të anulonte planet për një udhëtim me tren përpara gjysmëfinales së tyre kundër Anglisë dhe përfundimisht mbërriti katër orë më vonë se sa ishte planifikuar me avion.