Komisioni Qendror i Zgjedhjeve (KQZ), ka shqyrtuar sot projektvendimin për caktimin e numrit të monitoruesve për zgjedhjet e pjesshme për kryetar të Bashkisë Himarë, të datës 4 Gusht 2024.

Në mbledhjen e zhvilluar ditën e sotme, KQZ ka caktuar një monitorues për zgjedhjet më 4 gusht në bashkinë Himarë, e cila ka 36 qendra votimi.

“Ideja është për të pasur një monitorues, për të caktuar një monitorues për fushatën e zgjedhjeve të pjesshme për kryetar të Bashkisë Himarë, data 4 gusht 2024. Vendosim sipas këtij propozimi”, tha kryekomisioneri Ilirjan Celbashi.

Presidenti Bajram Begaj, caktoi datën 4 gusht për mbajtjen e zgjedhjeve të pjesshme në Himarë, pasi KQZ shpalli të pavlefshëm mandatin e kryetarit të zgjedhur, Fredi Beleri, i cili është dënuar me dy vite burg për blerje votash.

Pavarësisht arrestimit të tij më 12 maj 2023, dy ditë para zgjedhjeve, Fredi Beleri kandiati i Sali Berishës, nën siglën e Koalicionit “Bashkë fItojmë”, u zgjodh me shumicë votash nga qytetarët e Himarës. Nga burgu, kërkesat e tij të vazhdueshme për tu betuar si kryetar i zgjedhur u refuzuan,  dhe Himara u drejtua deri në 23 mars të 2024-s nga rivali I tij në zgjedhje dhe kryetari në detyrë Jorgo Goro, kohë kur u arrestua me urdhër të SPAK për tjetërsim pronash në Himarë. Himara bëhet kështu e para bashki me dy kryetar në burg. Fredi Belerin që nuk e ushtroi për asnjë ditë mandatin e tij, dhe ish-kryetarin për 3 mandate.