Reperi Noizy, emri i vërtetë i të cilit është Rigels Rajku, po përballet me akuzën e “Lëndimit të rëndë trupor” pas një përfshirjeje në një incident të dhunshëm në Pejë me TikToker-in Med Iseni.

Aktualisht i ndaluar në paraburgim së bashku me DJ Crax, një tjetër i përfshirë në ngjarje, Noizy vazhdon të pretendojë se është i pafajshëm. Avokati i tij, Besnik Berisha, ka folur në emisionin “Kosova Today”, duke ndarë informacione të reja për çështjen dhe gjendjen emocionale të reperit.

Sipas avokatit Berisha, çështja është bartur në Gjykatën e Durrësit dhe pritet të ketë një verdikt brenda javës. Ai thekson se nuk ka asnjë tendencë nga ana e Noizyt për të penguar procesin ligjor që ka nisur në Kosovë, përkundrazi, po bëhet çdo përpjekje për të ndriçuar të gjitha rrethanat që lidhen me incidentin.

“Ne po përpiqemi të zbardhim gjithçka që ka ndodhur atë natë. Noizy nuk ka asnjë qëllim të pengojë procesin, dhe kjo do të provohet në gjykatë,” tha Berisha. Sipas tij, incidenti nuk përbën “lëndim të rëndë trupor” siç pretendohet, por vetëm një lëndim të lehtë ndaj një personi.

Avokati vazhdon duke thënë se Noizy është viktimë e këtij procesi dhe nuk ka asnjë lidhje me lëndimin e rëndë. Ai thekson se dëshmitarët kanë dhënë informacion që tregon se reperi është i papërfshirë në ngjarje.

Lidhur me gjendjen emocionale të reperit, Berisha thotë se Noizy është mirë, jo sepse ndihet mirë në paraburgim, por sepse ndihet i pastër nga akuzat që janë ngritur kundër tij.

“Paraburgimi nuk është shtëpi pushimi, por Noizy ndihet mirë për faktin që e di se nuk ka bërë asgjë të gabuar dhe beson se drejtësia do të triumfojë,” tha Berisha. Ai shpreson që Gjykata në Shqipëri të marrë një vendim që do të lejojë reperin të presë në liri përfundimin e procesit gjyqësor.