Të paktën 40 persona janë vrarë në Gazën jugore dhe dhjetëra të tjerë janë plagosur në sulmet izraelite në një zonë të caktuar humanitare, ka thënë autoriteti i Mbrojtjes Civile i drejtuar nga Hamasi.

Ushtria izraelite tha se avioni i saj sulmoi një qendër operacionale në Khan Younis që i përkiste luftëtarëve të Hamasit dhe se kishte marrë masa për të ulur rrezikun e dëmtimit të civilëve.

Në sulm, ushtria izraelite pretendon se ka goditur “terroristët e Hamasit” dhe se “mbron civilët”, ndërsa burime mjekësore dhe media palestineze flasin për një masakër ndaj kampit me civilë e të pafajshëm.

Banorët vendas thanë se tre sulme kishin në shënjestër vendet që strehonin njerëz të zhvendosur në zonën humanitare të al-Mawasi, në perëndim të qytetit të Khan Younis, duke shkaktuar kratere të thella shtatë metra.

“Dyzet njerëz u vranë dhe më shumë se 60 u plagosën, ndërsa shumë janë ende nën rrënoja”, tha drejtori i operacioneve të autoritetit të Mbrojtjes Civile të Hamasit për BBC.

Dëshmitarët okularë i thanë BBC-së se shpërthime të mëdha tronditën zonën e al-Mawasi pak pas mesnate dhe flakët mund të shiheshin që ngriheshin në qiell.

Ushtria izraelite pretendon në një deklaratë se:

“Një qendër komanduese e Hamasit u godit në sulmin ajror ndaj Khan Younis”. Mesazhi i IDF-së specifikon se “terroristët e rëndësishëm të Hamasit që vepronin brenda qendrës komanduese u goditën dhe se para sulmit, u miratuan masa të shumta për të zbutur rrezikun e dëmtimit të civilëve”.