Rezistenca ndaj antibiotikëve po shndërrohet në një emergjencë globale të shëndetit, me pasoja alarmante për shëndetin publik. Në vitin 2019, rreth 5 milion njerëz vdiqën nga infeksione që nuk reagonin ndaj trajtimit me antibiotikë, ndërsa 1.3 milion të tjerë vdiqën direkt për këtë shkak. Ky problem është veçanërisht shqetësues në kontekste të luftës dhe konflikteve, ku përhapja e bakterieve rezistente intensifikohet.

Sipas një artikulli në “Politico”, luftërat dhe konfliktet po krijojnë kushte ideale për përhapjen e rezistencës mikrobike. Në zona si Gaza, ku mungojnë trajtimet e duhura, fëmijët shpesh përballen me amputime të gjymtyrëve për shkak të infeksioneve të pakontrolluara. Rory O’Neill, specialist i OBSH-së, paralajmëron se një shpërthim i tillë do të ketë pasoja të rënda në spitalet e rajonit dhe mund të përhapet në të gjithë botën, duke përfshirë Europën dhe SHBA-në.

Shkencëtarët po paralajmërojnë për një skenar të mundshëm që do ta çonte botën në periudhën para penicilinës, antibiotikut të parë të sintetizuar në vitin 1928, i cili revolucionarizoi mjekësinë. Keqpërdorimi i antibiotikëve, veçanërisht në blegtori, ka kontribuar në adaptimin dhe rritjen e rezistencës bakteriale.

Luftërat gjithashtu krijojnë vatra infeksionesh, duke treguar se bakteret mund të adaptohen ndaj toksicitetit të metaleve të rënda. Madje, përdorimi i armatimit që përmban zink dhe plumb në zona lufte po ndihmon në forcimin e këtyre bakterieve, duke e përkeqësuar më tej situatën.

Përballë kësaj krize, është thelbësore të ndërmerren masa të menjëhershme për të frenuar përhapjen e baktereve rezistente dhe për të mbrojtur shëndetin publik global.