Nostalgjia shpesh na kthen pas në kohë, veçanërisht tek ato vite të adoleshencës ose të njëzetave, që për shumë prej nesh janë shoqëruar me liri dhe pa shumë përgjegjësi.

Por, ndonëse këto vite mund të jenë të mbushura me kujtime të bukura, nuk ka arsye për trishtim nëse tashmë i keni lënë pas. Sipas një studimi të fundit, vitet më të lumtura të jetës nuk janë gjithmonë ato të rinisë.

Studimi, i publikuar në “Social Indicators Research”, zbulon se periudha më e lumtur në jetën e njeriut është në fillim të të tridhjetave, midis moshës 30 dhe 34 vjeç.

Profesori spanjoll i ekonomisë, Begoña Álvarez, që drejtoi studimin, anketoi qindra persona rreth moshës 50 vjeç nga 13 shtete të ndryshme. Pjesëmarrësit u ftuan të reflektonin mbi periudhat më të lumtura të jetës së tyre, dhe shumica e tyre përmendën të tridhjetat si vitet e tyre më të lumtura.

Sipas Álvarez, kjo lidhet me faktin se në këtë moshë njerëzit kanë arritur një stabilitet më të madh në aspektin profesional, ekonomik dhe personal, me një ndjenjë më të madhe të vetërealizimit dhe përgjegjësisë. Familja, fëmijët dhe të ardhurat më të qëndrueshme luajnë një rol të rëndësishëm në rritjen e kësaj ndjenje lumturie.

Megjithatë, lumturia nuk është ekskluzive për të tridhjetat. Jeta, me të gjitha uljet dhe ngritjet e saj, ofron momente të lumtura në çdo moshë. Çdo fazë e jetës ka bukurinë e saj dhe secili nga ne përjeton lumturinë në mënyra të ndryshme.

Për ata që ndihen në ankth për të mbushur 30 vjeç, ky studim mund të jetë një shenjë pozitive që vitet më të mira mund të jenë ende përpara!