FIFA ka hapur hetimet ndaj Serbisë pas ndeshjes me Zvicrën të premten mbrëma ku serbët u mposhtën me rezultatin 3 me 2. Sipas gazetës zviceriane “Tages Anzeiger”, vendimi është marrë pasi ka pasur shkelje të mundshme të tre neneve të kodit disiplinor të FIFA-s.

Këto janë nenet 12, 13 dhe 16. Neni 12 ka të bëjë me sjelljen e keqe nga lojtarët dhe zyrtarët, neni 13 me diskriminimin dhe neni 16 me sigurinë në ndeshje. Ndërkohë sipas mësohet se nuk do të ketë asnjë procedim disiplinor ndaj Zvicrës apo kapitenit Granit Xhaka.

Ndeshja mes Serbisë dhe Zvicrës ishte shumë e tensionuar pasi pala serbe provokonte vazhdimisht futbollistët shqiptarë, Granit Xhakën dhe Xherdan Shaqirin. Ky i fundit shënoi golin e parë të ndeshjes. Më pas futbollistët serbë kanë bërë gjeste të turpshme pasi shënuan golin e barazimit e më pas edhe atë të avantazhit momental.

Përplasja e ashpër ndodhi mes Xhakës dhe futbollistëve serbë rreth fundit të ndeshjes teksa tensionet prekën kulmin.