Një studente britanike është pezulluar për dy javë nga universiteti për shkak se mori foshnjën e saj me vete në klasë. Nëna 35 vjeçare Leah Foster, e cila ndjek Universitetin e Derbit theksoi se profesori i saj kishte rënë dakord ta merrte djalin e saj në klasë, por kjo masë është ndryshuar.

Pas një paralajmërimi fillestar, gruaja pranoi se nuk kishte zgjidhje tjetër veçse të vazhdonte të mbante fëmijën, por më pas iu tha se nuk mund të shkonte më në kampus. Zyrtarët thanë se ishte një çështje e shëndetit dhe sigurisë. Nëna e re u shpreh:

Ndjeva tronditje dhe mosbesim. U ndjeva keq sa po më diskriminojnë sepse kam lindur një fëmijë, por po përpiqem të vazhdoj studimet e mia. E kuptoj që njerëzit e tjerë po paguajnë për t’u diplomuar dhe gjëja e fundit që duan është një fëmijë që qan në klasë.

Zonja Foster po studion psikologji dhe shpreson të punojë për të mbështetur shëndetin mendor të nënave të reja. Universiteti i sugjeroi asaj të shtynte studimet për një vit, por Foster tha se kjo do ta vononte atë të gjente një punë dhe ndoshta të kishte një fëmijë tjetër.

Rikujtojmë, se një sportiste e vaterpolit në Chania u bë virale në rrjet pasi vendosi të merrte beben e saj të porsalindur dhe të kujdesej për të në momentet e pushimit të ndeshjes. Notarja Markella Ploumi është fotografuar në stol duke ushqyer foshnjën e saj disa muajshe pak para se të zhytej në ujë, për ndeshjen miqësore me NO Rethymnon.