Ditën e kaluar Luiz Ejlli ka bërë një rrëfim prekës brenda shtëpisë së “Big Brother VIP”. Në një bisedë me Kiara Titon, ai theksoi se prej pak kohësh vuan nga një sëmundje e rrallë, por që nuk e zbuloi se për çfarë saktësisht bëhet fjalë.

Përveç kësaj ka treguar gjithashtu se ka vetëm 11 klinika në botë për kurimin e saj dhe një prej tyre, ku Luizi është interesuar është e zënë deri në gusht. Ndërkohë që ajo që ka marrë gjithashtu vëmendjen është edhe reagimi i Kiarës, e cila është shprehur se nëse do të ishin bashkë nuk do ta kishte lënë kurrë.

E së fundmi lidhur me këtë, pati një reagim nga Ronela Hajati, e cila thotë se e njeh këngëtarin që 13 vjeç kur ata ishin në “Ethet e së premtes”. Ajo uron që të shërohet sa më shpejt duke qenë se është në një moshë shumë të re. Ndër të tjera Ronela shprehet:

Me thënë të drejtën nuk merrem kurrë me komente apo të jap opinione, por uroj me gjithë zemër që ky djali që e njoh që 13 vjeç (kur kemi qenë te Ethet) të shërohet sa më shpejt. U përlota, mbase se jam bërë tepër e ndjeshme kur bëhet fjalë për sëmundje, gjëra që dikush në lule të moshës nuk i meriton kurrë! Jeta është shumë e padrejtë ndonjëherë dhe uroj me gjithë zemër të kthehet vetëm në një kujtim të keq dhe kaq.