Me vendim të Organizatës së Kombeve të Bashkuara, (OKB) ka një Ditë Botërore të Parandalimit të Mbytjeve dhe ajo është sot, më 25 korrik. Referuar statistikave, mbytja është shkaku kryesor i vdekjeve aksidentale në rang botëror. Çdo vit, vlerësohet se 236 mijë njerëz mbyten e ky është një problem i madh i shëndetit publik në mbarë botën, pasi barra e pasojave ndihet në të gjitha ekonomitë e po ashtu rajonet.

Në veçanti për fëmijët e të rinjtë e moshës deri 24-vjeç, mbytja është një nga shkaqet kryesore të vdekjeve në nivel global.  Vendet me të ardhura të ulëta e të mesme përbëjnë mbi 90% të vdekjeve aksidentale nga mbytja. Më shumë se gjysma e tyre në botë ndodh në Rajonin e Paqësorit, si dhe të Azisë Juglindore.

Dita Botërore e Parandalimit të Mbytjes shërben si një mundësi për të nxjerrë në pah ndikimin tragjik e po ashtu të thellë të këtij aksidenti në familje e komunitete, si dhe për të ofruar zgjidhje jetëshpëtuese për ta parandaluar. Kombet e Bashkuara theksojnë nevojën për veprim urgjent të koordinuar e marrje masash në disa sektorë si:

∙vendosja e barrierave që kontrollojnë aksesin në ujë;

∙sigurimi i vendeve të sigurta larg ujit në sistemin parashkollor;

∙mësimin e notit, sigurinë në ujë dhe aftësitë e shpëtimit të sigurt;

∙trajnimin e qytetarëve për shpëtim dhe reanimim të sigurt;

∙vendosja dhe zbatimi i rregulloreve të sigurta të lundrimit, transportit e trageteve;

∙përmirësimin e menaxhimit të rrezikut nga përmbytjet.

Në Shqipëri, ky sezon veror është shënuar nga dy tragjedi, si rasti i mbytjes se babait e dy djemve të mitur në plazhin e Vilë-Bashtovës në Gosë të Rrogozhinës, si dhe më i fundit i shënuar të premten e 21 korrikut në liqenin e Banjës në Gramsh. Një burrë me dy djemtë e tij dhe nipin humbën jetën tragjikisht në ujërat e këtij liqeni.