Rreth 13.4 milionë foshnje kanë lindur para kohe në vitin 2020 në mbarë botën. Hulumtimi lidhur me lindjet e parakohshme u publikua nga autorët e OBSH, Fondit të Kombeve të Bashkuara për Fëmijët (UNICEF) dhe Shkollës së Higjienës dhe Mjekësisë Tropikale në Londër. “Rreth 13.4 milionë foshnje kanë lindur para kohe në vitin 2020, që përbën afërsisht një në dhjetë të të gjitha lindjeve të gjalla”,-thuhet në raport.

Duke theksuar se lindja e parakohshme është shkaku kryesor i vdekjes së fëmijëve në vitet e para të jetës, raporti thekson se ekziston nevojë urgjente për të forcuar kujdesin ndaj foshnjeve të parakohshme për të rritur shkallën e mbijetesës. Është vërtetuar se të lindurit para kohe kanë probabilitet të lartë për të vuajtur nga sëmundje të rënda, paaftësi, vonesa në zhvillim si dhe sëmundje kronike si diabeti dhe problemet e zemrës në moshë madhore.

“Nuk ka patur ulje të ndjeshme të shkallës së lindjeve të parakohshme në asnjë rajon të botës në dekadën e fundit. Ulja vjetore globale e lindjeve të parakohshme midis 2010 dhe 2020 ishte vetëm 0.14%”,-thuhet në raport. Rreth 65% e lindjeve të parakohshme në vitin 2020 janë regjistruar në Afrikën Sub-Sahariane dhe Azinë Jugore.

Raporti shpjegon se lindja e parakohshme nuk është problem që shihet vetëm në vendet me të ardhura të ulëta dhe të mesme dhe se kjo situatë prek familjet në mbarë botën. Ndërsa lindshmëria e parakohshme ishte 11.6% në Greqi dhe 10% në SHBA, kjo statistikë u regjistrua edhe në disa vende me të ardhura të larta.