Një prokuror në një gjykatë në Shën Petersburg ka kërkuar një dënim me 8 vjet burg për piktoren Alexandra Skochilenko, e cila u arrestua për protestën kundër luftës së Rusisë në Ukrainë. 33-vjeçarja dyshohet se zëvendësoi etiketat e çmimeve në supermarkete me etiketa të falsifikuara që lexonin slogane kundër luftës. Prokurori Alexander Gladyshev i kërkoi gjykatësit në Shën Petersburg ta dënojë atë me 8 vjet burg dhe ta ndalojë përdorimin e internetit për tre vjet.

Prokurorët e kishin akuzuar më parë për kryerjen e një krimi të rëndë nga “urrejtja politike ndaj Federatës Ruse” dhe thanë se ajo e dinte saktësisht se çfarë po bënte. 33-vjeçarja organizoi protestën e saj vitin e kaluar më 31 mars, duke zëvendësuar etiketat e çmimeve në një supermarket qendror të qytetit me imitime të etiketave që bënin thirrje për t’i dhënë fund luftës. Skochilenko, e cila mohon akuzat duke thënë se protesta e saj ishte plotësisht paqësore, u arrestua më 11 prill 2022, pasi një klient u ankua për veprimin e saj. Ajo është në gjyq me akuzën e shpërndarjes me vetëdije të informacionit të rremë për ushtrinë ruse, një vepër e dënueshme deri në 10 vjet burg.

Një nga etiketat akuzoi ushtrinë ruse për bombardimin e një teatri në qytetin port të Mariupolit, ku ishin strehuar rreth 400 njerëz, një akuzë që Moska në atë kohë tha se ishte e rreme. Një tjetër etiketë thoshte se Rusia po dërgon trupa për të luftuar në Ukrainë, një e treta citoi të plagosurit e supozuar dhe kritikoi televizionin shtetëror që nuk fliste për ta dhe një i katërti kritikoi presidentin rus Vladimir Putin për gënjeshtra dhe shkrime.  Seanca e radhës për këtë çështje do të mbahet më 13 nëntor.