Sekretari i Përgjithshëm i OKB-së, Antonio Guterres, deklaroi të dielën se është thellësisht i tronditur nga fakti se dy shkolla të OKB-së u goditën brenda një periudhe prej më pak se 24 orësh në Rripin e Gazës, duke rezultuar në vdekjen ose plagosjen e dhjetëra civilëve, kryesisht gra dhe fëmijë, që kërkuan strehim.

“Qindra mijëra civilë palestinezë po kërkojnë strehim në objektet e OKB-së në të gjithë Gazën për shkak të përshkallëzimit të luftimeve. Ju siguroj se objektet tona janë të paprekshme”, tha Guterres.

Sipas tij, lufta mes Izraelit dhe militantëve të Hamasit, të cilët sundojnë Gazën, po shkakton “një numër tronditës dhe të papranueshëm viktimash mes civilëve”. Guterres bëri thirrje për një armëpushim të menjëhershëm humanitar.

Kreu i agjencisë së OKB-së për refugjatët palestinezë UNRWA përsëriti thirrjen e tij për një armëpushim në Gaza të shtunën, duke thënë se ata po merrnin “imazhe të tmerrshme dhe pamje të dhjetëra njerëzve të vrarë dhe të plagosur” në sulmin izraelit ndaj shkollës së Al-Fakhoura.

“Kemi marrë imazhe dhe pamje filmike të tmerrshme të një numri njerëzish të vrarë dhe të plagosur në një shkollë tjetër të UNRWA që strehon mijëra të zhvendosur në veri të Rripit të Gazës. Këto sulme nuk mund të bëhen të zakonshme, ato duhet të ndalen. Një armëpushim humanitar nuk mund të presë më. Tmerre të vazhdueshme, një tjetër shkollë @UNRWA që strehonte më shumë se 4000 njerëz është bombarduar disa herë në veri të Gazës. Dhjetëra u raportuan të vrarë duke përfshirë fëmijë. Hera e dytë në më pak se 24 orë që shkollat ​​nuk kursehen. MJAFT, këto tmerre duhet të ndalen”, shkroi Philippe Lazzarini në X (ish-Twitter).

Më herët të shtunën, dhjetëra palestinezë u vranë dhe u plagosën në bombardimet izraelite të qendrës mësimore të drejtuar nga OKB-ja në kampin e refugjatëve Jabalia.

Izraeli filloi sulmet ajrore dhe më vonë një inkursion tokësor pas sulmit të 7 tetorit nga grupi palestinez Hamas. Që atëherë, ata kanë vrarë më shumë se 12,000 njerëz, shumica prej tyre gra dhe fëmijë, dhe kanë rrafshuar mijëra struktura civile dhe ka imponuar një bllokadë të plotë që çoi në mungesë të furnizimeve bazë si ushqime, karburant dhe ilaçe.