Meshkujt që konsumojnë ushqim pikant kanë nivel të lartë testosteroni. Ky ka qenë zbulimi i shkencëtarëve nga Universiteti i Grenoble të cilët studiuan përmbajtjen e ushqimeve pikante dhe nivelin e hormoneve. Në një shkrim për të përditshmen prestigjioze “The Telegraph”, është sqaruar se këto rezultate janë në përputhje me studimin e një sërë sjelljesh tek meshkujt. Në studim morën pjesë 114 burra të moshës 18 deri 44-vjeç. Ata provuan ushqime pikante dhe rezultatet treguan se ata që konsumuan nivele të larta ushqimi pikant, kishin nivel të lartë testosteroni.

Hormoni i testosteronit luan një rol të rëndësishëm tek meshkujt. Ai kontrollon rritjen, zhvillimin dhe sundon mbi vrullin e tij seksual. Ushqimi pikant, po ashtu ndihmon në humbjen e peshës, parandalon kancerin, ul presionin e gjakut, mbron zemrën si dhe ndihmon në uljen e stresit.

Një tjetër hulumtim ka zbuluar se meshkujt e martuar kanë mesatarisht testosteron më të ulët se ata që mbeten beqarë dhe është e mundur që stresi i të pasurit familje të jetë përgjegjës. Analiza e 11 studimeve shkencore që përfshinin më shumë se 25,000 burra zbuloi se ata që janë të martuar ose në një lidhje kanë nivele mesatare më të ulëta të testosteronit.

Është interesante se ky ishte veçanërisht rasti në studimet që shqyrtonin burrat e moshës së mesme dhe më pak tek burrat e moshuar. Studiuesit që bënë analizën thonë se kjo mund të pasqyrojë streset e jetës familjare, duke përfshirë fëmijët në familje. Ka prova nga hulumtimet e mëparshme se përjetimi i stresit mund të zvogëlojë sasinë e testosteronit të prodhuar nga meshkujt. Por ky është vetëm një shpjegim i mundshëm pasi analiza nuk ishte krijuar për të përcaktuar nëse baballarët mund të fajësojnë fëmijët e tyre për më pak testosterone.